ရန်နိုင်မြင့်ဆိုတာ (၂)

မှတ်မှတ်ရရ (၈) တန်းမှာ MICT Park နှစ်ပတ်လည်ပွဲမှာ Counter Strike 1.5 နဲ့ စ တွေ့တာပဲ။ ဆော့ရတာ ခေါင်းတွေလည်း မူးလိုက်တာ ဆိုတာ မပြောပါနဲ့။ ဒါပေမယ့်လည်း မနေနိုင် မထိုင်နိုင် ဆော့တာပဲ။ ၉ တန်းလောက်မှာထင်တယ် ဖေဖေက Pentium 4 စဆင်ပေးတယ်။ Graphic Card က GeForce FX5200 (128MB) နဲ့။ အဲဒီအချိန်က ကိုယ် ဆရာကြီးပဲ။ ဘာလို့လဲဆိုတော့ အဲဒီ Specification နဲ့ ပေါ်သမျှ Game အားလုံးနီးပါး ဆော့လို့ရတယ်။ Windows က XP လောက် ထွက်နေပြီ။ အဲဒီအချိန်မှာ Chatting အနေနဲ့ဆိုရင် ကျွန်တော် Yahoo Messenger နဲ့ MSN Messenger သုံးနေပြီ။ နောက်ပြီး ပြည်တွင်းက CGI Chat သုံးတယ်။ Gmail မရှိသေး။ Yahoo Mail နဲ့ Hotmail ဆိုတာ သုံးတယ်။ နောက်ပြီး ပြည်တွင်းဖြစ် Mail4u ဝယ်သုံးတယ်။ အဲဒီတုန်းက Planet နာမည်နဲ့လားမသိ Forum ရှိတယ်ထင်တယ် ငယ်ငယ်က ကြားဖူးပေမယ့် ကျွန်တော် အဲဒီထဲမှာ မကျဉ်လည်ခဲ့ဘူး။ သိပ်မကြာပါဘူး အဖြစ်အပျက်လေးတစ်ခု စ တယ်။

MICT Park နှစ်ပတ်လည်ပွဲမှာပဲ ဂိမ်းခွေငမ်းနေရင်းနဲ့ပေါ့။ အခွေတစ်ခုကို ဘာကြောင့်မှန်းမသိ တော်တော်လေးစိတ်ဝင်စားသွားတယ်။ ပုံတွေဘာတွေသိပ်မပါဘူး။ တကယ်က RedHat တံဆိပ်ကြီး။ ဒါပေမယ့် ငယ်တော့ ကျွန်တော်မသိဘူး။ ဒီဂိမ်းက တော်တော် ဆော့လို့ကောင်းမှာပဲ လို့ထင်တယ်။ အခွေက ၃ ခွေတွဲဗျ။ RedHat 9။ အဲဒါနဲ့ ကျွန်တော် ဝယ်လာတယ်။ အိမ်ရောက်တော့ ထုံးစံအတိုင်း CD Drive ထဲထည့်လိုက်တော့ မြင်နေကျတွေလိုမဟုတ်ပဲ ဘာမှလုပ်မရဘူး။ တစ်ခွေပြီးတစ်ခွေ ထည့်တယ်။ ပုံမှန်ဆို ဂိမ်းတွေက rar file တွေ အများကြီးစုပြီး Extract လုပ်ရတာကိုး။ ဒါပေမယ့် တစ်ခွေပြီးတစ်ခွေအခေါက်ခေါက်အခါခါ ထည့်စမ်းတော့ ဘာမှလုပ်လို့မရဘူး။ Windows XP ပေါ်မှာလုပ်နေတာကိုး။ အဲဒါနဲ့ ထင်လိုက်တာက အခွေမကောင်းဘူးထင်ခဲ့တာ။ အဲလိုနဲ့ အဲ့နေ့ညက ဂိမ်းတွေဘာတွေ ဆော့ပြီး အိပ်သွားတယ် အထဲမှာ အခွေကိုထည့်ထားတာ မထုတ်ဖြစ်ဘူး။

မနက်လည်းကျရော ကျွန်တော့် ထုံးစံအတိုင်း မနက်မျက်စိနှစ်လုံး ဘွားကနဲ ပွင့်တာနဲ့ ကျွန်ပြူတာ စ ဖွင့်တာပဲ။ ဖွင့်တော့မှ RedHat 9 က Bootable ဖြစ်ပြီး တက်လာတယ်။ အဲဒါနဲ့ ပျော်သွားပြီး Install ပေါ့။ တတ်သလောက် မှတ်သလောက် လျှောက်နှိပ်လိုက်တော့… Installation ပြီးသွားတယ်။ (အထဲက Windows လည်းပျက် Data တွေလည်းပျက်တာပေါ့ 😛 ) Installation လည်းပြီးသွားရော RedHat 9 OS ကြီးတက်လာကော။ Username Pass နဲ့ အထဲဝင်လိုက်တော့ သူ့ရဲ့ Desktop GUI ထဲရောက်သွားတယ်။ သေချာတာ Windows လောက်တော့မလှဘူး။ (အဲဒီအချိန်ထိ အဲဒီ RedHat 9 ကို ဂိမ်းလို့ပဲထင်သေးတာ)။ ဟိုလျှောက်နှိပ် ဒီလျှောက်နှိပ်ရင်းနဲ့မှ “သြော် ဒီကောင်က Windows လိုပါလား” ဆိုတာ တဖြည်းဖြည်း သဘောပေါက်လာတယ်။ အဲဒီထဲမှာ Built-In ပါလာတဲ့ ဂိမ်းလေးတွေ ကစားဖြစ်တယ်။

နောက်တော့ ဖေဖေရောက်လာပြီး “ဟာ မင်းက Linux တွေဘာတွေသုံးလို့ပါလား” ဆိုပြီး ငါပြမယ်ဆိုပြီး Terminal ကို ဖွင့်တယ်။ နောက်တော့ Command လေးတွေ ရိုက်ပြတယ် သင်ပေးတယ်။ ဒါပေမယ့် အဲဒီအချိန်က ကျွန်တော် စိတ်မဝင်စားဘူး။ စာတွေချည့်ပေါ်နေတာကိုး။ ကိုယ်က ဂိမ်းပဲ ဆော့ချင်တာ။ ls တို့ ဘာတို့ ပြတော့ပြပေမယ့် ဘာမှ ရေရေရာရာ မသိခဲ့ဘူး မှတ်လည်းမမှတ်ခဲ့ဘူး။ ဒါဟာ ကျွန်တော် ၈ တန်း/၉ တန်း ကျောင်းသားဘဝမှာ Red Hat နဲ့ ပထမဆုံး ထိတွေ့ဖူးခဲ့တာပါပဲ။

တစ်နေ့မှာ ဖေဖေ့ရုံးက အသိတစ်ယောက်ရဲ့ Game ခွေတွေချည့်စုထားတဲ့ အခွေအိတ်ကြီးတစ်ခု ဖေဖေယူလာတယ်။ ပျော်လိုက်တာဆိုတာ အထဲမှာ ဂိမ်းတွေမှ နည်းတာမှမဟုတ်တာ။ အဲဒီလူကြီးရဲ့ စကားတစ်ခု ကောင်းကောင်းမှတ်မိတယ်။ Game ဆော့တာဟာ လူကို Sharp ဖြစ်စေတယ်။ ထက်မြတ်စေတယ်တဲ့။ တဒင်္ဂ ဆုံးဖြတ်ချက်တွေ မှန်ကန်စေတယ်။ ကျိုးကြောင်း ဆီလျော်မှုရှိအောင် စဉ်းစားတတ်စေတယ်။ အစုံပဲ ဂိမ်းဆော့တာရဲ့ ကောင်းကျိုးတွေ သူ တန်းစီပြောနိုင်တယ်။ အဲဒီလူကြီးက မြန်မာမဟုတ်ဘူး Foreigner ပဲ။ အသက်လည်းကြီးပေမယ့် အရမ်းလည်းမဟုတ်ဘူး (ခုဆို မကြာသေးခင်ကပဲ ဆုံးပါးသွားခဲ့ပြီ)။

၉ တန်းမှာ စ ပြီး ကျောင်းက Multi-Media Class Room တွေ စ ဝင်ဖူးတယ်။ အရင်ကတော့ ဝင်ဖူးပေမယ့် ၉ တန်းမှာတော့ ကျောင်းမှာ ကွန်ပြူတာသင်တန်း ဆိုပြီး စ လုပ်ပေးတာနဲ့ စိတ်ဝင်စားလို့ စ တက်မိခဲ့တာ။ ဒါပေမယ့် အဲ့သင်တန်းမှာ ကိုယ်က သီးခြား စက်မှာထိုင်ရတယ်။ ဆရာဆရာမ တွေလောက်တော့ မသိ မတတ်ပေမယ့် ကိုယ်က ကျောင်းသားတွေထဲမှာတော့ ဆရာကြီးပဲ။ 😛 တချို့ကိစ္စလေးတွေမှာ သိတာတတ်တာလေးတွေ ဝင်ပြီး မျှဝေပေးရတယ်။ ဘာလို့ဆို အဲဒီအချိန်မှာ မြန်မာစာကို ကောင်းကောင်းရိုက်တတ်နေပြီ။ အဲဒီအချိန်တုန်းက Zawgyi လည်းမရှိ Unicode လည်းမရှိ။ Win Font နဲ့ Matrix Font တွေပဲရှိတယ်။ Adobe Page Maker အရမ်းခေတ်စားတဲ့အချိန်ပေါ့။ အဲဒီကွန်ပြူတာသင်တန်းလည်း ရှိသလို ကျောင်းပွဲတော်မှာ ကွန်ပြူတာ ပန်းချီပြိုင်ပွဲလည်း ရှိတော့ Camp သွင်းခံရတဲ့ထဲမှာ ကိုယ်ပါတယ်။ ၉ တန်း နဲ့ ၁၀ တန်းမှာ ကွန်ပြူတာ ပန်းချီ ပထမ နဲ့ ဒုတိယ ဆု နှစ်ခုရတယ်။ MSPaint နဲ့ပဲ ပုံဆွဲရတာပါပဲ။ လက်ရေးပန်းချီမှာလည်း ဒုတိယဆု ချိတ်ခဲ့တယ်။ ဆုတော့ ဘယ်နှစ်ကမှ တက်မယူဖြစ်ဘူး ဘာလို့လည်းဆိုတော့ ခန်းမထဲမှာ လူအရမ်းရှုပ်တော့ ကိုယ်က အပြင်မှာပဲ ဆော့နေဖြစ်တာ။ 😛

ဂိမ်းတွေချည့်ပဲ ပြောနေလို့ ကျောင်းစာကိုကော မကြိုးစားဘူးလား မေးစရာရှိတယ်။ ကျွန်တော် ၅ တန်းလောက်ထဲက စာတော့လုပ်ပေမယ့် အောင်ဖို့ပဲ လုပ်တာ။ အမှတ်များဖို့တို့ဘာတို့ သိပ်ပြီးစိတ်ထဲမှာ ဖီလင်မလာဘူး။ အေးအေးဆေးဆေးပဲ။ ကျွန်တော့်ကို အပေါင်းအသင်းတွေထဲမှာ အချင်းချင်း လာပြိုင်ကြတယ်။ ပြိုင်လည်း ပြိုင်ပေါ့ ကိုယ်ကမှ အမှတ်မများချင်တာ။ စာမေးပွဲမှာ ရသလောက်ဖြေတယ်။ ဖြေသလောက် ရမှာပဲ။ မကျရင်တော်ပြီ ကျန်တာစိတ်မဝင်စားဘူး ဆိုတာမျိုးပဲနေလာခဲ့တာ။ ၁၀ တန်းမှာ ရေသည်ကို မကျက်ဘူး ဖတ်ပဲ ဖတ်တယ်။ ကိုယ်တိုင် စာပြန်ရေးတယ်။ English ရဲ့ Essay ဆိုတာ ကျက်စာတစ်ခုလို့ မသတ်မှတ်ခဲ့တာအမှန်ပဲ။ လုံးဝ မဖြစ်မနေ ကျက်ရမယ်ဆိုတဲ့ဟာကိုပဲ ကိုယ့်နည်းကိုယ့်ဟန်နဲ့ရွေးထုတ်ပြီးကျက်တယ်။ ၁၀ တန်းဖြေခါနီးတော့ မေမေ ငိုတော့တာပဲ မှတ်မိတယ်။ ကျွန်တော် မြန်မာစာကို သိပ်မှမကျက်တာ။ မကျက်တော့ အ ထစ် အ ထစ်နဲ့ ဂိုက်ရှေ့မှာ စာပြန်ရင် အဲဒီလိုပဲ။ ဒါပေမယ့် ရေးချရင်တော့ ချောနေအောင် ရေးချနိုင်တယ်။ အဲလို စာပြန်ရင် အ ထစ် အ ထစ် ဖြစ်နေတာကို ကြည့်ပြီး ငါ့သားလေးတော့ ကျတော့မှာပဲ ဆိုပြီး မေမေက ငိုခဲ့တယ်။ ဒါပေမယ့် မြန်မာစာအမှတ် ၆၅ မှတ်ရတယ်။ 😀

ဒီလိုနဲ့ ၁၀ တန်းအောင်လာခဲ့တယ်။ ၁၀ တန်းအောင်ပြီး အမှတ်တွေ မသိရသေးခင်ထဲက ဘယ်တက္ကသိုလ်တက်ရမလဲ ဆိုတာ စဉ်းစားခိုင်းတယ်။ ကျွန်တော ်မစဉ်းစားပါဘူး။ ဒါပေမယ့် တက္ကသိုလ်ရယ်လို့ တက်ဖြစ်မယ်ဆိုရင် ကိုယ့် ဘော်ဒါတွေနဲ့ပဲ တက်ချင်တာ။ အဲဒီအချိန်က အရမ်း Hot ဖြစ်နေတာက GTC ပေါ့။ GTC တက်ကြမယ့် ဘော်ဒါတွေ အများကြီးရယ်။ အဲဒီမှာ ဘယ်လို Major တွေရှိတယ် ဘာညာ ပေါ့ ကြားရသိရတယ်။ ကိုယ်လည်း တက်ချင်တယ်။ နောက်ထပ်ကျောင်းတစ်ခုက ကွန်ပြူတာတက္ကသိုလ် ပေါ့။ ကိုယ့်အမှတ်နဲ့လည်း မှီတယ်။ စဉ်းစားရင်း စဉ်းစားရင်းနဲ့ ဘယ်ကျောင်းမှ မတက်ဖြစ်ခဲ့ပါဘူး။ ၁၀ တန်းအောင်တော့ Technoland ဆိုတဲ့ Company မှာ အလုပ်သင် စ ဝင်ဖို့ဖြစ်လာတယ်။ ကိုယ်ကလည်း ကွန်ပြူတာတွေကို စိတ်ဝင်စားတော့ Technoland မှာ အလုပ်ဝင်တာကို တက္ကသိုလ်တွေ ရွေးတက်ရမှာထက် စိတ်လှုပ်ရှားတယ်။ ဒီလိုနဲ့ Technoland မှာ အလုပ်ဝင်ပြီး Dagon တက္ကသိုလ်မှာ English Major ကို အဝေးသင်အနေနဲ့ တက်ခဲ့တယ်။

ဆက်ရန်ရှိသေးသည်။ 😀