ရန်နိုင်မြင့်ဆိုတာ (၆)
၂၀၁၀ ကနေ The Cyber Wings Team ရယ်လို့စဖွဲ့ပြီး အဓိက လုပ်ချင်တာက Computer Service တွေလုပ်ချင်ခဲ့တာ။ အဲဒါအတွက်လည်း Service Catalog တွေထုတ်၊ Project ရဖို့အရေး လိုက်ပြီး Hook တွေ လိုက်စွဲ။ ဒါပေမယ့် တစ်ယောက်ထဲမဟုတ်ပဲ အဖွဲ့တစ်ခုအတွက်အားလုံး အတူတူ ဆိုတော့ Project က တစ်ခု နှစ်ခု ရရုံနဲ့ မပြီးတော့ အတော်လေး ပင်ပန်းတယ်။ ရသလောက်တော့ လိုက်လုပ်တယ်။ အားတဲ့အချိန် ရုံးမှာ Self-Study လုပ်တယ်။ စမ်းစရာရှိတာတွေ ဆက် စမ်းတယ်။ တဖြည်းဖြည်းနဲ့ စမ်းတာတွေက အရင်လို အခြေခံလေးတွေ မဟုတ်တော့ပဲ တဖြည်းဖြည်း မြင့်လာခဲ့တယ်။ CentOS ကို သုံးနေရင်းနဲ့ CentOS ဟာ Desktop/Workstation သုံးဖို့ အတော်လေးလိုအပ်ချက်တွေများနေတာကို သတိထားမိတော့ Desktop/Workstation သုံးဖို့အတွက် Linux Distribution နောက်တစ်ခုကို ထပ်ရှာမိတယ်။ CentOS နဲ့လည်း သဘောတရားချင်းဆင်တူရမယ် ပေါ့။ အဲဒါနဲ့ Fedora Linux ကိုသွားတွေ့တယ်။ အဲဒါနဲ့ Fedora ကို တင်ပြီး သုံးတော့ အတော်လေး ကိုယ့်အတွက်အဆင်ပြေစေတယ်။ Fedora ကို စ သုံးတော့ Fedora 13 မှာ စ သုံးခဲ့တယ်။
နောက်ပြီး ရုံးမှာ Computer နောက်ထပ်ထပ် ဆင်ဖို့ Budget တွေတောင်းတယ်။ လိုအပ်ချက်ကို အကျိုးသင့် အကြောင်းသင့် တင်တော့ ရုံးကလည်း Budget ချပေးတာနဲ့ စိတ်ကြိုက် Server တစ်လုံး ကိုယ်တိုင်ဆင်တယ်။ အဲဒီပေါ်မှာ CentOS နဲ့ Virtualization ထိုင်လိုက်တယ်။ oVirt လားဆိုတော့ မဟုတ်ဘူး ရိုးရိုး KVM လေးထိုင်ခဲ့တာပါ။ အဲဒါလေးနဲ့ ရုံးအတွက်လိုအပ်တဲ့ File Server တွေ Communication Server တွေထိုင်ပေးတယ်။ ပိုတဲ့ Resource ကို စမ်းသပ်မှုတွေ R&D လုပ်တယ်။ စမ်းသပ်မှုတွေလုပ်လို့ရအောင်လည်း Budget တင်ထဲက များများသုံးနိုင်အောင် ကြိုစီစဉ်ခဲ့တယ်။ အဲဒီအချိန်မှာ CentOS ပေါ်မှာ အများကြီးကောင်းကောင်းလုပ်နိုင်နေပြီ။ Desktop ကိုတော့ Fedora သုံးတာပေါ့။ နောက်ပြီး အဲဒီ အတတ်ပညာတွေနဲ့ အားတဲ့ စနေတနင်္ဂနွေတွေမှာ မနားပဲ Project တွေလိုက်လုပ်တယ်။ ဒီလိုနဲ့ File Server ပေါင်းစုံ၊ Chatting Server တွေ၊ Web Application တွေ Gateway Server တွေ Bandwidth Control လုပ်တာတွေ Load Balancing တွေနဲ့ အခြား နည်းပညာတွေကို အချိန်ရှိတိုင်း တစ်ခုပြီးတစ်ခု ရုံးမှာစမ်းတယ် ဖတ်တယ် – အဆင်ပြေရင် အပြင်မှာ လက်တွေ့အသုံးချတယ်။ ဒီလိုနဲ့ လုံးလည်ချာလည် လိုက်လာခဲ့တာ – ၂၀၁၃ သြဂုတ်လ ထဲကိုရောက်လာပါလေရော…
Fedora Project မှာ မြန်မာနိုင်ငံ ကိုယ်စားလှည်အဖြစ် လှမ်းလျှောက်တော့ Fedora ရဲ့ တရားဝင် ကိုယ်စားလှည် (သူတို့ပေးတဲ့ရာထူး = “Ambassador”) ဖြစ်လာတယ်။ အဓိက တာဝန်ကတော့ Fedora Linux ကို အသုံးပြုသူ ပိုမိုများစေဖို့နဲ့ Fedora ကိုအသုံးပြုတဲ့အခါ အခက်အခဲတွေကို ဖြေရှင်းပေးဖို့ပါပဲ။ အဲဒါအတွက် မြန်မာနိုင်ငံထဲမှာ Fedora ကို မိတ်ဆက်ပွဲ လုပ်ပေးဖြစ်တယ်။ Fedora ရဲ့ ပထမဆုံးမိတ်ဆက်ပွဲ နဲ့ Fedora Linux Version 20 Release Party ကတော့ ဘားလမ်းထဲမှာရှိတဲ့ Orchid City Hall Hotel ရဲ့ Restaurant မှာ January 12, 2014 နေ့မှာပါပဲ။ အဲဒီပွဲဖြစ်မြောက်ဖို့အတွက်အတူတူပါဝင်ခဲ့တဲ့ Fedora Core Member တွေလည်းအများကြီးပါပဲ။
အဲဒီပွဲမှာ ဘယ်တုန်းကမှ မရခဲ့ဖူးတဲ့ အတွေ့အကြုံရတာပါပဲ။ ဘာလဲဆိုတော့ လူတွေ အများကြီးရှေ့မှာ စကားပြောရတဲ့အတွေ့အကြံုပဲ။ အဲဒီနေ့မတိုင်ခင်မှာ အဲဒီပွဲအတွက် ပွဲမှာပြဖို့တွေကို သက်ဆိုင်ရာ Core Member တွေနဲ့အတူ ကျွန်တော်ကိုယ်တိုင်လည်း စမ်းသပ်တာတွေ လုပ်နေတဲ့အတွက် အဝတ်အစားတွေက ဟိုတယ်ရောက်တဲ့အထိ ညကအတိုင်းပဲရှိသေးတယ်။ ပွဲကို မေမေ လာပြီး အဝတ်အစားနဲ့ ရှူဖိနပ် လာပေးတယ်။ ကျွန်တော်လည်း အဝတ်အစားလဲမယ်ဆိုပြီး အိမ်သာထဲဝင်ပြီး အဝတ်အစားလဲတယ်။ ရှူးဖိနပ်ကိုစီးတယ်။ နောက်ပြီးလည်းပြီးရော – ကျွန်တော် အိမ်သာတံခါးကို မဖွင့်ရဲတော့ဘူး။ တော်တော်ကြာတယ်။ အပြင်မှာလူတွေ အများကြီးပဲ။ ကျွန်တော် မသွားရဲဘူး။ လူတွေအများကြီးရှေ့မှာ တစ်ခါမှ စကားမပြောဖူးတဲ့ ကျွန်တော် ခပ်ရှင်းရှင်းပြောရရင် ကြောက်တယ်။ အတော်ကြာစဉ်းစားတယ် ငါထွက်သွားလို့ရှိရင် လူတွေရှေ့ စ ရောက်ပြီဆိုပြီးတွေးတယ်။ ဒါပေမယ့် ရှောင်လွှဲလို့မရတော့ဘူးလေ။ ဒါကြောင့် အကောင်းဆုံးဖြစ်အောင်လုပ်မယ်လို့ ဆုံးဖြတ်ချက် ဒုန်းဒုန်းချပြီးသာ ပွဲထဲက ကိုယ့်နေရာကိုသာ ထွက်လာခဲ့တာ စိတ်ထဲမှာ စကားပြောရမှာ ကြောက်နေတုန်းပဲ။ အဲဒီနေ့က ကျွန်တော် ပြောရမယ့် အကြောင်းအရာတွေကို ကျွန်တော် ထ ပြောနေတဲ့အချိန်မှာ လက်တွေလည်း တုန်နေခဲ့တယ်။ ချွေးလည်းပြန်နေတယ်။ အဲဒီအပြင် ကျွန်တော် ရှေ့ကသာ ဟန်မပျက် ပြောနေပေမယ့် ဒူးတွေပါ တုန်နေခဲ့တယ်။ ပထမဆုံး အတွေ့အကြံုတင်မကပဲ ကိုယ်က Leader မို့ ကိုယ်က ရှေ့ဆုံးကနေ စ ပြောရတာဆိုတော့ အတော်လေး ဖိအားများခဲ့တယ်။ ဒါပေမယ့် အဆင်ပြေအောင်တော့ အားတင်းပြီးလုပ်နိုင်ခဲ့ပါတယ်။
ဒီလိုနဲ့ Fedora ပွဲကို အောင်မြင်အောင် ကျင်းပပြီးနောက်မှာတော့ 2014 ခုနှစ် UCSY IT Camp ရယ် BarCamp Yangon 2014 ရယ် BarCamp Mandalay 2014 မှာ Fedora နဲ့ပတ်သက်တာတွေ တက်ရောက်ပြောကြားဖြစ်ခဲ့တယ်။
အဲဒီနောက်မှာတော့ 2014 ခုနှစ် August လ ထဲမှာပဲ ကွန်ပြူတာတက္ကသိုလ် ရန်ကုန် (UCSY) မှာပဲ တက္ကသိုလ်ရဲ့ Knowledge Sharing အချိန်မှာ Linux အကြောင်းများ၊ Linux ၏ အလုပ်လုပ်ပုံများ၊ ဆက်စပ် Technology များအကြောင်းနှင့် Hardware အကြောင်းများ စတာတွေကို ဖိတ်ကြားမှုအရ သွားရောက်ဟောပြောတာတွေဆက်လုပ်ဖြစ်ပါတယ်။
အဲဒီအပြင် ကမ္ဘာအေးဘုရားလမ်းပေါ်က မိုးလေဝသနှင့် ဇလဗေဒ (ငလျှင်ဌာန) မှာလည်း သူတို့ရဲ့ လိုအပ်ချက်အရ Fedora Installation ပြုလုပ်ပေးခြင်းတွေ ဆက်လက်လုပ်ဆောင်ခဲ့တယ်။
ဆက်ပါဦးမယ် – ဒီအတိုင်းဆိုရင် အပိုင်း ၁၀ ကျော်လောက်မယ်ထင်တယ် 😀
