ရန်နိုင်မြင့်ဆိုတာ (၄)

Technoland Computer Trading Co., Ltd. မှာ ၃ နှစ်မပြည့်တပြည့် အလုပ်လုပ်ပြီးတော့ ထွက်ခဲ့ပါတယ်။ ထွက်ထွက်ချင်းတော့ ဘာလုပ်ရမလဲ မသိခဲ့ဘူး။ ဒါပေမယ့် CompuTech မှာ Hardware (A+) နဲ့ Network+ တက်ခဲ့တုန်းက သူငယ်ချင်းတွေဖြစ်ခဲ့ကြတဲ့ ကို တင်းထွန်းနိုင် ရယ် ကိုစိုးနိုင်ထွန်း ရယ် ၃ ယောက်ပေါင်းပြီး “3Proxy” ဆိုတဲ့ နာမည်နဲ့ Computer Service Team လေးတစ်ခုလုပ်ဖြစ်တယ်။ အဲဒီအချိန်က Internet Cafe` တွေ အင်မတန် များတဲ့အချိန်ပေါ့။ ကိုယ်တွေလုပ်တတ်တာ Windows OS တင်မယ်၊ Application တွေ ထည့်မယ်၊ Virus တွေသတ်မယ်၊ Hardware Fault တွေ ရှာနိုင်တယ်၊ Network ချိတ်နိုင်တယ်၊ Router Configuration လုပ်ပေးနိုင်တယ်။ ဒီလောက်ပါပဲ။ လက်ထဲမှာ လိုအပ်တာဆိုလို့ CD တွေထည့်တဲ့ အိတ်တစ်လုံးနဲ့ Screw Driver တစ်ချောင်းပဲလိုအပ်တာ။ အဲဒီလိုနဲ့ Internet Cafe` တွေကို လိုက်မေးတယ် လိုက် မိတ်ဆက်တယ်။ ကျွန်တော်တို့ အဲ့တုန်းက မှန်းခဲ့တာက Internet Cafe` တွေကနေ လစဉ် စာချုပ်နဲ့ Service ရဖို့ ရည်မှန်းခဲ့ပေမယ့် Internet Cafe` တွေမှာ တစ်လုံးပျက်ရင် တစ်လုံးသွားပြင်ရတာမျိုးပဲဖြစ်ခဲ့တယ်။ သူများတွေက ပျော်ပျော်ရွှင်ရွှင် Internet သုံး၊ လေ့လာနေချိန်မှာ ကိုယ်တွေက သူတို့ဘေးက Computer ပုံကို ခုံအောက်ထဲဝင် ဖွင့်ပြီး စမ်းသပ်တာတွေလုပ်ရတယ်။ တချို့ တော်တော်ဆိုးဆိုးအခြေအနေတွေမှာဆိုရင် ဖုန်တွေပေတူးနေရော ဒါပေမယ့် ချွေးကလည်းထွက်တော့ အလုပ်ကြမ်းသမားတစ်ယောက်လိုပဲ ရုန်းကန်ခဲ့တယ်။ ဒါပေမယ့် ဒါဟာ ရေရှည်အတွက် အဆင်ပြေမှာမဟုတ်ဘူးဆိုပြီး တွေးမိတယ်။ ဒါပေမယ့် မတတ်နိုင်ဘူးလေ လုပ်တတ်တာလည်း ဒါပဲ ဆိုတော့ ဒါပဲ သစ္စာရှိရှိ ဆက်လုပ်တာပါပဲ။

တစ်နေ့ကျတော့ Focus Energy Ltd (BVI) ဆိုတဲ့ ပြည်ပ Company ကနေ သူတို့ရုံးအတွက် Computer တွေအသစ်ဆင်တာကို လုပ်ပေးဖို့ အလုပ်အပ်လာတယ်။ ကိုယ်လည်း ပျော်ရွှင်ပြီး သွားတာပေါ့။ Computer အသစ်တွေကို စိတ်ကြိုက် တစ်ပိုင်းစီဝယ်ပြီး စိတ်ကြိုက်ဆင်ပေးတယ်။ Network တစ်ရုံးလုံးချိတ်ပေးတယ်။ Printer တွေကအစ အကုန် အစအဆုံးလုပ်ပေးတယ်။ အဲဒီတုန်းက Sakura Tower မှာပါ။ နောက်တော့ Maintenance ပါလုပ်ပေးပါ ဆိုတာနဲ့ အဲဒီရုံးမှာ လိုအပ်တာတွေရှိရင် လုပ်ပေးလို့ရအောင် Stand By နေပေးရင်းနဲ့ ADSL လည်း ကပ်သုံးရင်းနဲ့ အဲဒီရုံးမှာပဲ အချိန်ကုန်ကုန်သွားတယ်။ တစ်နေ့ကျတော့ အဲဒီရုံးက General Manager ရဲ့ ကွန်ပြူတာ ဘာဖြစ်လို့လဲမသိဘူး ဝင်လုပ်ပေးရင်းနဲ့ General Manager က “မင်းလုပ်ပုံကိုင်ပုံကို သဘောကျတယ်၊ အဆင်ပြေရင် မင်းကိုအလုပ်ခန့်ချင်တယ်။ နောက်နေ့ကစပြီးအလုပ်လာဆင်းပါ” ဆိုပြီးပြောတော့ ကျွန်တော် ပါးစပ် အဟောင်းသားနဲ့ ဟုတ်ကဲ့လို့သာပြောခဲ့ရပေမယ့် အိမ်နဲ့လည်း တိုင်ပင်ချင်သေးတာမို့ အိမ်နဲ့တိုင်ပင်ပြီး အိမ်က မီးစိမ်းပြတော့ အဲဒီရုံးမှာ Technician အနေနဲ့ အလုပ်ရသွားတယ်။ ပြောရရင် စေတနာတွေ ရောင်ပြန်ဟပ်တယ်ထင်ပါတယ်။ တစ်ရုံးလုံးကို ကွန်ပြူတာ နဲ့ Netowrk ဆင်ပေးထားတာ ကျွန်တော်ကိုယ်တိုင် ကျွန်တော့လက်အစုံနဲ့ စေတနာပါပါ သေသေချာချာဆင်ပေးထားတာမို့ Computer တွေ တစ်လုံးမှ လှည့်ကြည့်ဖို့မလို စိုးရိမ်ဖို့ကိုမလို အားလုံးကိုပစ်ထားပြီး ကျွန်တော့် Technician ရုံးခန်းထဲမှာ အချိန်ရှိသရွေ့ စိတ်ကြိုက်လေ့လာလို့ရတာပါပဲ။ ADSL ကလည်း ရှိသလို Network နဲ့ Printer ကလည်း အဆင်သင့်ပဲ။ ကျွန်တော့်အတွက် Self-Study လုပ်ဖို့အကောင်းဆုံးအခြေအနေကို ရရှိခဲ့တယ်။ ကျွန်တော့်ဘဝရဲ့ ရွှေရောင်နေ့ရက်တွေက အဲဒီမှာ စ တာပါ။ ကာလအားဖြင့် ၂၀၀၈ ခုနှစ် အစောပိုင်း ဝန်းကျင်မှာပါ။

၁ နှစ်လောက်လည်း အလုပ်လုပ်ပြီးရော ကျွန်တော် Self-Study လုပ်လာတာတွေ တော်တော်များပြီပေါ့။ ဒါပေမယ့် Linux နဲ့ပတ်သက်တာ မလေ့လာဖြစ်သေးဘူး။ Windows မှာ IIS, MSSQL, PHP တွေသွင်းပြီး Web App လေးတွေ စမ်းကြည့်တယ်။ Windows နဲ့ပတ်သက်တဲ့ အခြေခံလေးတွေ လိုက်လေ့လာတယ်။ အခြားသော လူမှုရေးလေးတွေနဲ့ဆိုတော့ အချိန်ပြည့်ဆိုပေမယ့် အဲဒီအချိန်မှာ အားစိုက်သလောက် မထွက်သေးဘူး။ စပြီး Self-Study လုပ်ခါစ ဆိုတော့လည်း မလုပ်တတ်သေးတာလည်းပါမှာပေါ့။ ဒီလိုနဲ့ အဲ့ Sakura Tower ထဲက တခြားရုံးတွေမှာ Local Web Server လေးနဲ့ Web App လေးတွေ သွင်းပေးတာတွေ လုပ်ဖြစ်လာတယ်။ မကြာခင်မှာပဲ Linux နဲ့ ထိတွေ့ဖို့ဖြစ်လာခဲ့တယ် ….

တနေ့မှာ ကျွန်တော့် ရုံးက Boss ကပြောတယ်။ “ACCESS DENIED တွေကြုံနေရတယ်။ သူသွားချင်တဲ့ တချို့ Website တွေကိုသွားလို့မရဘူး။ ငါ့ကို စောင့်ကြည့်နေတယ်လို့ခံစားရတယ်။ Dedicated Line ရှိတယ်ဆိုရင် ရအောင်လုပ်ပေး။ အဲဒါကို ဖြေရှင်းပေးဖို့ မင်းကြိုးစားပေး။” လို့ပြောတော့ ကျွန်တော် စဉ်းစားတယ်။ ရှင်းရှင်းပြောရရင် သူပြောတာကိုဖြေရှင်းပေးဖို့ Your Freedom နဲ့ Ultrasurf သုံးခိုင်းတာကလွဲရင် ကျွန်တော် ဉာဏ်မမှီဘူး။ ဒါပေမယ့် Your Freedom နဲ့ Ultrasurf ကိုလည်း မသုံးစေချင်ဘူး။ အဲဒါနဲ့ Internet ပေါ်မှာ တက်ရှာတယ်။ Forum တွေလိုက်ဖတ်တယ်။ နောက်တော့ “Proxy” ဆိုတာ တွေ့တာနဲ့ အဲဒီကောင်ကိုဘယ်မှာဝယ်လို့ရမလဲဆိုတာ လိုက်ရှာတယ်။ ကို Ye Naung လို့ခေါ်တဲ့ အသိတစ်ယောက် က Proxy ရောင်းတယ်ဆိုတာနဲ့ သူ့ဆီကနေ ရုံးအတွက် Proxy Account တစ်ခု ဝယ်လိုက်တယ်။ တစ်လကို ၃ သောင်းနှုန်းနဲ့ ၃ လစာ ၉ သောင်းစီ ချေပေးရတယ်။

သိပ်မကြာပါဘူး သူ့ဆီကနေပဲ တခြားသူတွေအတွက်ပါ ချိတ်ပေးပြီး Proxy Account တွေ ရောင်းပေးတော့ တစ်နေ့မှာ ကိုရဲနောင်က “ညီလေးကို Domain တစ်ခု လက်ဆောင်ပေးမယ်။ ညီ ကြိုက်တဲ့ နာမည် စဉ်းစားပေး။ .asia နဲ့ ရမယ်” တဲ့။ အဲဒါနဲ့ ကျွန်တော် စဉ်းစားတယ် ၂ ရက်လောက်ကြာမယ်ထင်တယ်။ အဲ့ Domain နာမည်ကိုကျွန်တော် ရေရှည်သုံးချင်တာ။ အဖွဲ့တစ်ခုဖြစ်ဖို့ထိလည်း ရည်ရွယ်တယ်။ နာမည်မှာ နည်းပညာနဲ့ပတ်သက်တဲ့စာလုံးလည်းပါချင်တယ်။ ကျွန်တော်စိတ်ဝင်စားတဲ့ လေယာဉ်တွေနဲ့ပတ်သက်တဲ့စာလုံးလည်းပါချင်တယ်။ စဉ်းစားရင်း စဉ်းစားရင်းနဲ့ Cyber Wings ဆိုပြီး နာမည်ပေးဖြစ်သွားတယ်။ အဲဒီအချိန်ကစပြီး ခု Cyber Wings Co., Ltd သုံးနေတဲ့ cyberwings.asia ဆိုတဲ့ Domain ကို ကိုရဲနောင်ဆီကနေ လက်ဆောင်ရလာခဲ့တာ။ 😀

အမှန်အတိုင်း ဝန်ခံရရင် ဒေါ်လာစျေးက ၇၀၀/၈၀၀ လောက်ရှိတဲ့အဲ့အချိန်မှာ Proxy ၃ လစာဖိုး ၉ သောင်းဆိုတာ မက်လောက်စရာပဲ 😀 ။ အဲဒါနဲ့ ကျွန်တော့်အတွက် လမ်းပွင့်သွားတယ်။ ကျွန်တော် Proxy Server တစ်ခုထိုင်ချင်တယ်။ အဲဒီမှာ Self Study ကို စူးစူးစိုက်စိုက် လုပ်ဖြစ်သွားတယ်။ Internet မှာ လိုက်ရှာတယ် လိုက်ဖတ်တယ်။ Article ၁ ခု ၂ ခု မက လိုက်ဖတ်ရင်းနဲ့ တွေ့သွားတာက Linux VPS ဆိုတာ လိုတယ်ဆိုတာ တွေ့သွားတယ်။ ဒါပေမယ့် VPS ကို ဘယ်ကနေ ဝယ်ရမလဲ ကျွန်တော်မသိဘူး။ အဲဒါနဲ့ အသိမိတ်ဆွေတွေကော ကိုရဲနောင်ကိုကော မေးတော့ နောက်ဆုံး ကို Win Maw Oo ဆီကနေ VPS ဝယ်ဖြစ်သွားတယ်။ အဲဒီတုန်းက မှတ်မိသလောက်ဆိုရင် CentOS 6, RAM 128 MB နဲ့ Storage က 10GB လား 20GB လားမသိဘူး အဲဒါလေးကို တစ်လ ၁ သောင်းခွဲ နှုန်းနဲ့ ဝယ်လို့ရခဲ့တယ်ထင်တယ်။ အဲဒါနဲ့ ဝယ်တော့ ကျွန်တော့်ကို စာရွက်လေးနဲ့ IP Address ရယ် Root Password ရယ်ရေးပြီးပေးလိုက်တယ်။ ပျော်ပြီး ရုံးကိုပြန်လာတာပေါ့… ရုံးကိုလည်းရောက်ရော…

ကျွန်တော့် Computer ရှေ့မှာ စာရွက်ကို ကြည့်တယ်… နောက်တော့ Monitor ကိုကြည့်တယ်… နောက် စာရွက်ကို ပြန်ကြည့်တယ်… ကျွန်တော် ဒီ IP Address ကို ဘယ်နေရာမှာ ရိုက်ထည့်ရမလဲ မသိဘူးဗျ။ အဲဒါနဲ့ Web Browser: Firefox ကို ဖွင့်တယ် အဲ့ IP ရိုက်ထည့်တော့လည်း ဘာမှ တက်မလာဘူး။ ဒုက္ခတော့ရောက်ပီ ဒီကောင်ကို ဘယ်လိုဝင်ရပါ့မလဲ တိုင်ပတ်နေပီ။ အဲဒါနဲ့ ကို ဝင်းမော်ဦးဆီ ဖုန်းဆက်ပြီးမေးတော့မှ … “ညီလေး Putty ဆိုတာရှိတယ် အဲဒီကောင်ကို Download စွဲပြီးဝင်ပါ” လို့ပြောတာနဲ့ သူပြောတဲ့အတိုင်းလိုက်လုပ်တော့မှ … အမလေး Login တောင်းပြီဗျ။ 😀 ကျွန်တော် root နဲ့ သူ့ password ရိုက်ထည့်လိုက်တော့ ဝင်သွားခဲ့ပါပြီ။ ထုံးစံအတိုင်း Login ဝင်ပြီးတော့ Bash Shell ထဲရောက်တာပေါ့။ ကျွန်တော် Shell ကိုကြည့်ပြီး ဘာရိုက်လို့ရိုက်ရမှန်း မသိတော့ဘူး။

BUT! ဒါပေမယ့် ကျွန်တော်လုပ်ချင်တဲ့ ရည်ရွယ်ချက် ရှိတယ်လေ။ အဲဒီ ရည်ရွယ်ချက်ကပဲ ကျွန်တော့်ကို ဆက်လက်ခေါ်ဆောင်သွားတယ်။ ကျွန်တော် Proxy Server ထိုင်ဖို့အတွက် How To တွေဖတ်တယ်။ အဲဒီအချိန်က သုံးတာ Squid ပေါ့။ ဒါပေမယ့် Linux လုံးဝမသုံးဖူးတဲ့ ကျွန်တော့်အဖို့ ပြတဲ့ Tutorial တွေက Source တွေကို Download လုပ်ပြီး Compile လုပ်ခိုင်းတာတွေချည့်ပဲ။ စာတွေလည်းရိုက်ရတယ် အဲဒီအချိန်ကတော့ ဘာတွေမှန်းကိုမသိပါဘူး။ Copy Paste တွေပဲပေါ့။ တစ်ချက် တစ်ချက်မှာ လမ်းစ ပျောက်သွားတယ်။ How To ထဲမှာ ပြထားတာလည်း ဒီအတိုင်းပဲ ကိုယ်လုပ်ရင် မရဘူး ဆိုတာမျိုးတွေဖြစ်သွားတယ်။ အဲဒီအချိန် အရမ်းစဉ်းစားရတယ် ခေါင်းတွေကနေ အငွေ့ပါထွက်သလားအောက်မေ့ရလောက်တဲ့ထိ စဉ်းစားတယ်။ “မလုပ်တော့ဘူးကွာ” ဆိုတာမျိုး အားမလျှော့ခဲ့မိဘူး။ မဖြစ်ဖြစ်အောင်လုပ်မယ်ဆိုတာပဲ ခေါင်းထဲရှိခဲ့တယ်။

နောက်ဆုံးကျတော့ လုံးဝ အဆင်ပြေသွားတယ်။ အဆင်ပြေဖို့အတွက်ကို ကျွန်တော် ၃ ရက် ၄ ရက်လောက် နေ့နေ့ ည ည အဲဒါပဲ ခေါင်းထဲမှာ ရှိတယ် အဲဒါကိုပဲ ထိုင်လုပ်နေခဲ့ရတယ်။

အဲဒီအချိန်မှာ ကျွန်တော် Proxy ပြန်ရောင်း နိုင်ခဲ့တယ်။ တစ်လကို ၃ သောင်းနဲ့ပဲ တစ်လထဲမှာတင် ၁၃ ယောက်ကနေ ၁၅ ယောက်လောက်ထိ ရောင်းနိုင်ခဲ့တယ်။ ကိုယ့်အသုံးစရိတ်အပြင် အိမ်ကိုပါ ပြန်ထောက်ပံ့နိုင်ခဲ့ပါတယ်။

သင်ခန်းစာ

(၁) ဘယ်အရာပဲလုပ်လုပ် ရည်ရွယ်ချက်ရှိတဲ့အလုပ်/ဝါသနာပါတဲ့အလုပ် ဆိုရင် အတော်လေးခရီးပေါက်တယ်။ ငယ်ငယ်က Linux ကို ထိတွေ့ဖူးခဲ့ပေမယ့် စိတ်မဝင်စားတဲ့အပြင် ရည်ရွယ်ချက်ကလည်း လုံးဝမရှိတော့ ဘာမှ ကိုယ့်အတွက် မကျန်ခဲ့ပေမယ့် အခု ရည်ရွယ်ချက်လည်းရှိတဲ့အပြင် ဝါသနာလည်းပါတော့ အလုပ်ဖြစ်သွားတယ်။ ဒါဟာ ကွာဟချက်ပါပဲ။

(၂) Self-Study လုပ်တာမှာ ကိုယ်ဖတ်တာတွေထက် ကိုယ်ကိုယ်တိုင်ကလွဲပြီး ကိုးကွယ်စရာမရှိဘူး။ လမ်းစပျောက်သွားတဲ့အခြေအနေမျိုးရောက်ရင် ဇွဲမလျှော့လိုက်ဖို့ လိုအပ်တယ်။ ဒါပေမယ့် တခါတလေကျရင် ခဏတဖြုတ် နားသင့်တယ် ခေါင်းဆေးသင့်တယ်။ ကော်ဖီလေးတစ်ခွက်ကို ဟိုးအဝေးက သစ်ပင်တွေကို လှမ်းကြည့်ပြီး အေးအေးဆေးဆေး သောက်သင့်တယ်။

(၃) တစ်ခုခုကို Self-Study လုပ်တဲ့အခါ “ဒါကို လေ့လာချင်လို့” ဆိုတာမျိုး စိတ်ထဲသွင်းထားတာထက် “ဒါကိုသုံးပြီး ငါဘာဖြစ်အောင်လုပ်မယ်” ဆိုတာမျိုးက ပိုပြီး တိကျသလို ကိုယ့် Self-Study အတွက် အထောက်အကူ အများကြီးဖြစ်ပါတယ်။

ဆက်ရန်ရှိပါသေးတယ် – အခုမှ Self Study ကို တကယ်စလုပ်ဖြစ်ပြီး အရသာတွေ့သွားတာ